Тедеде эрзянь ды мокшонь келень читне тешкставсть республикань весе районтнэсэ. Саемга, Покш Игнатбуесэ арсезель покш программа. Зярыя чинь перть эрзянь школатнесэ ютасть кенярксчить, панжозельть выставкат, пурназельть аволь классо мероприятият ды ламо лия мезть. Парсте анокстасть Эрзянь ды мокшонь кельтнень кенярксчинтень Андрейвелень школасо: пурнасть покш выставка М.Е.Евсьевьевень 150 иетнень топодемантень, нолдасть сонензэ алтазь газета, эйкакштне сермадсть сондензэ рефератт, вейсэ тонавтыцяст марто ютавтсть классонь част. Вишкинетнень туртов мельспарокс ульнесь «Букварень покш чись», «Занимательной грамматикань» коряс панжадо урокось, Андрейвелень эйдень кужосо «Эрзянь мастор» ежомарямонь кепедемань урокось, книгань выставкась ды истя седе тов.

Тиринь келень вадря кенярксчи ютась Покш Игнатовань средней общеобразовательной школасо. Эйкакштне анокстасть пек паро концерт, морасть эрзянь кельсэ морот, ловность стихть, невтсть сценкат. Те чистэнть ламо кортазель тиринь келенть ванстомадо ды седе домкасто тонавтнемадо.

Лембе валт пурнавозтненень евтась МР-нь Образованиянь министерствань дошкольной, общей ды дополнительной образованиянь прявт специалистэсь Н.В.Салмова. МР-нь Образованиянь министерстванть пельде вадря важодемань кисэ Почетной грамотасо казизе Андрейвелень эрзянь келень тонавтыцянть Г.А.Дорофеевань.

МР-нь Национальной политикань министерстванть пельде Шнамо коневсо казезельть Н.А.Чучадеева ды Л.В.Семенова тонавтыцятне.